CIG, UXT e CCOO decidiron solicitar unha mediación no Acordo Interprofesional Galego sobre procedementos extraxudiciais de solución de conflitos laborais (AGA) co obxectivo de “desbloquear” o conflito do transporte na provincia da Coruña, que o venres alcanzou a súa sétima xornada de folga.

A través dun comunicado, o responsable de Transportes da FGAMT-CIG, Ernesto López, asegurou que con esta acción rexistrada na tarde do venres pretenden coñecer “as intencións reais da patronal”.

Deste xeito, afeou a actitude tomada polo conxunto empresarial, que tacha de “inmobilismo férreo” e describe como “comportamento anómalo” ao non abrir aínda ningunha vía de contacto: “Ante un conflito desta dureza o lóxico é falar para tentar solucionalo, pero non temos sequera aberta unha mesa de negociación nin ningún tipo de contacto”.

Da mesma forma, acusou á Xunta de Galicia de permanecer “desaparecida” e de “non importarlle” as condicións do traballo do persoal e a situación dos usuarios de autobús que non poden acceder ao servizo por motivo de folga.

Doutra banda, o representante da CIG reiterou a “vontade de diálogo” da parte social para avanzar nun novo acordo que tome en consideración as peticións dos traballadores.

Sen autobuses e con piquetes: nova xornada de paros no transporte de viaxeiros da Coruña