A Deputación da Coruña estará presente un ano máis na Feira Internacional de Turismo (FITUR), que se celebrará en Madrid do 21 ao 25 de xaneiro, cunha proposta propia integrada no espazo da Xunta de Galicia. A institución aproveitará este escaparate internacional “para presentar unha iniciativa única que sitúa á provincia como o escenario ideal para gozar dun evento único: a eclipse solar total do próximo 12 de agosto“, informa.
O espazo estará situado no pavillón 9 do recinto feiral Ifema. A presentación, a cargo da área de Turismo da Deputación, terá lugar o xoves, 22 de xaneiro. Será baixo o título ‘Un atardecer, dous atardeceres: a eclipse na provincia da Coruña’, a cargo da astrofísica e profesora da Universidade de Santiago (USC), Begoña Nicolás Ávila.
NOVA SENDA PEONIL EN NARÓN
Por outra banda, a Deputación da Coruña e o Concello de Narón presentaron este luns aos veciños de San Xiao o proxecto dunha nova senda peonil, unha infraestrutura que se construirá na estrada provincial DP-5404 (Xuvia-A Frouxeira), na zona de Prados. A obra, que conta cun orzamento de 534.170 euros, busca transformar a mobilidade na zona e dar resposta a unha demanda histórica dos residentes.
O presidente da Deputación, Valentín González Formoso, e a alcaldesa de Narón, Marián Ferreiro (TEGA), mantiveron un encontro cos veciños no local da Asociación de San Xiao para explicar os detalles técnicos desta primeira fase. A actuación desenvolverase entre os puntos quilométricos 1+500 e 2+950, sumando un total de 1,45 quilómetros de senda pola marxe esquerda, cun ancho de 1,80 metros.
González Formoso subliñou a intención da institución provincial de acelerar os prazos. “Tentaremos que os veciños cedan os terreos para evitar os trámites de expropiación e axilizar a execución”, sinalou o presidente, quen estimou un prazo de obra de seis meses. Non entanto, matizou que, de ser necesario o proceso expropiatorio, o orzamento e os tempos poderían ver incrementados lixeiramente.
COLABORACIÓN CO BANCO DE ALIMENTOS
Noutra orde de asuntos, a Deputación da Coruña e o Banco de Alimentos asinaron un acordo polo que a institución provincial concédelle á entidade unha subvención de 100.000 euros para apoiar a compra de alimentos de primeira necesidade e a contratación de persoal que garante o bo funcionamento da mesma. O acordo foi subscrito polo presidente da Deputación, Valentín González Formoso, e o presidente do Banco de Alimentos, Manuel Mora, na sede da Deputación coruñesa.
O convenio conta cun orzamento total de 138.221,15 euros, que inclúe tanto a compra de alimentos como os gastos de persoal necesarios para o desenvolvemento da actividade. A Deputación da Coruña achegará até un máximo de 100.000 euros, o que supón máis do 72 % do financiamento total. Formoso destacou que a colaboración é especialmente “relevante” polo contexto actual de cifras de risco de pobreza ou exclusión social, aseverou.
