Constituíuse hoxe a Comisión Especial sobre o Mundial 2030. Despois de máis dun ano de silencio do goberno municipal sobre o proxecto, e tras varias peticións da oposición, a comisión celebraba a súa primeira sesión baixo a presidencia do voceiro municipal, José Manuel Lage Tuñas, acompañado do edil de Deportes, Manuel Vázquez; así como Secretario Municipal, o voceiro do PP, Miguel Lorenzo e o edil do BNG David Soto.
”É unha boa noticia a constitución da comisión en si e que o Goberno Local se comprometese nela a facilitar o acceso de todos os grupos á documentación sobre a candidatura”, sinalan dende o BNG, dende onde tamén fixeron a proposta, que foi aceptada, de que na comisión vaian comparecer todas as persoas que teñen a ver coa defensa da candidatura diante da FIFA.
Máis crítico foi o voceiro do PP. “Estamos decepcionados coa Comisión Especial sobre o Mundial 2030 porque esperabamos información e non a recibimos”, sinalou Lorenzo, destacando que a convocatoria limitouse “á constitución”, cumprindo unha moción do PP aprobada por unanimidade en decembro. “É un tema que preocupa moito aos coruñeses, hai moita expectación, pero nós non podemos informar nin aclarar nada porque nada se nos dito ou explicado na comisión desta mañá”, lamenta.
“Esperamos que pronto se reúna de novo a Comisión, xa con todos os expedientes encima da mesa e aí nos informen de todas as xestións”, conclúe o edil do grupo da oposición, que espera que haia máis novidades na nova reunión da comisión, acordada para antes de que remate o mes de febreiro.
Máis novas do Mundial 2030
A oposición pedirá no pleno transparencia arredor do Mundial 2030
Inés Rey asegura que a cidade non periga “en absoluto” como sede do Mundial 2030
