Un operario faleceu este luns na Coruña tras caer dun tellado no que traballaba no IES Agra do Orzán. Segundo informou o 112, o traballador atopábase na cuberta do instituto, situado na Rúa Alcalde Liaño Flores, cando caeu desde varios metros de altura por causas que se investigan.
O que se coñece ata o momento, segundo as mesmas fontes, é que o traballador estaba a realizar tarefas de limpeza no tellado cando se derrubou a superficie na que se atopaba apoiado, o que provocou a caída. Polo se trata dun novo accidente laboral.
SOBRE O SEIS DA TARDE
Foi o persoal de Urxencias Sanitarias de Galicia-061 o que alertou ao 112 Galicia minutos antes das 18:00 horas. Desde o Centro Integrado de Atención ás Emerxencias activouse un operativo no que tamén colaboraron axentes da Policía Nacional. Unha vez no lugar, os profesionais sanitarios só puideron confirmar o falecemento do traballador.
PERSOAL DE EDUCACIÓN TRASLÁDASE Ao CENTRO
Pola súa banda, fontes do Goberno autonómico trasladaron que o home falecido non traballaba nunha obra executada pola Consellería, polo que por agora non dispón de máis información. O operario era unha persoa que o centro contrataba habitualmente para pequenas tarefas de mantemento.
Así mesmo, confirmou que persoal da Consellería desprázase ao centro para “apoiar no que sexa necesario”.
Finalmente, a Xunta trasladou as súas condolencias á familia do traballador falecido e á comunidade educativa do instituto.
