A sección cuarta da Audiencia Provincial da Coruña revogou a sentenza dun tribunal de Betanzos e condenou a Abanca a devolver máis de 200.000 euros correspondentes a transferencias non consentidas realizadas desde as contas dun cliente. Desta forma, estima a demanda de reclamación por responsabilidade contractual e obriga ao banco a abonar ao prexudicado 67.141 euros, 157.023 dólares e 55.583 dólares nas tres contas afectadas, cantidades ás que haberá que sumar os intereses moratorios calculados desde maio de 2019.

A sala basea a súa decisión en que a entidade bancaria non demostrou que as operacións fosen autorizadas polo usuario nin que este actuase con neglixencia grave. Durante o proceso, a parte apelante solicitou unha proba pericial de recoñecemento de voz, admitida en segunda instancia, para argumentar a súa falta de implicación nos feitos. Os maxistrados lembran que a normativa actual instaura unha responsabilidade case obxectiva para o provedor de sistemas de pagos, sendo a entidade a que debe acreditar a fraude ou a falta de dilixencia do cliente.

A sentenza subliña que o banco se limitou a probar que se utilizaron as claves e a liña telefónica do demandante, pero recalca que isto non supón que o titular facilitase os códigos de xeito voluntario. Segundo os maxistrados, existen actualmente moitos medios fraudulentos para obter claves sen o concurso do prexudicado, polo que a entidade debe confirmar que a autenticación foi realmente autorizada polo titular e non só confirmada tecnicamente. Esta resolución non é firme, xa que cabe presentar un recurso de casación ante o Tribunal Supremo.