A Casa Museo Casares Quiroga da Coruña acolle hoxe martes, ás 18.30 horas, a presentación do libro ‘Entre os muros do esquecemento’, do xornalista pontevedrés Juan de Soa Vollbrecht. Nel narra a vida de Ramón García Martínez, o marido da leiteira de Campañó (Pontevedra) que sobreviviu ao inferno do campo de Mauthausen.
Segundo explican os organizadores, a investigación levada a cabo para a elaboración desta obra e “o traballo de Luís Bará e Montse Fajardo conseguiron en 2018 que Ramón fose declarado vítima oficial do nazismo”.
O seu autor, xornalista especializado en Dereitos Humanos, explicará durante este encontro “como chega a el a primeira información sobre García, as dificultades da investigación e como esta fascinante vida acaba sendo desvelada”.
“Un exercicio de memoria imprescindible que axuda no presente a non esquecer os riscos do fascismo, o de entón e o que agora blanquea irresponsablemente a ultradereita en toda Europa”, apunta.
Así, esta obra, publicada polos editorial Libros del Futuro, “combina o drama histórico coa crónica íntima dunha vida de superación, coa solidariedade, a memoria e a resiliencia humana como valores presentes ao longo das súas páxinas”.
“‘Entre os muros do esquecemento‘ é o resultado de máis de dous anos de investigación e sucesivas viaxes aos distintos escenarios nos que a historia vital de Ramón transcorreu”, detalla.
Máis novas
Unha guía para seguir o rumbo dos deportados coruñeses aos campos nazis
O Consello da Memoria Democrática propón aplicar o informe José Cornide tras 5 anos no caixón
