O goberno local da Coruña mantivo este luns unha reunión de traballo coa directiva da Federación de ANPAs dos colexios públicos da cidade para abordar a situación actual das instalacións e as principais demandas da comunidade escolar. No encontro, celebrado no Palacio de María Pita, a alcaldesa, Inés Rey, e o concelleiro de Educación, Juan Ignacio Borrego, trasladaron ás representantes das familias o compromiso municipal co mantemento dos centros de titularidade municipal.

Durante a xuntanza, recalcou tamén a disposición do consistorio a seguir colaborando coa comunidade educativa para dar resposta ás necesidades detectadas. O obxectivo, segundo sinalaron desde o goberno local, é traballar de forma conxunta para garantir unhas infraestruturas adecuadas e un ensino público de calidade a través dunha comunicación fluída coas nais e pais do alumnado coruñés.

Doutra banda, o Concello reuniu este luns aos consellos sectoriais de Inclusión Social e Saúde, que realizaron as súas sesións plenarias ordinarias no centro cívico dos Mallos co fin de reforzar a coordinación co tecido social. Paralelamente, o parque de San Diego acolleu os actos programados para conmemorar o Día da Árbore, unha efeméride protagonizada por medio centenar de alumnos e alumnas do CEIP Sal Lence, que participaron nos traballos iniciais para plantar 40 novos exemplares no parque coruñés.