A Policía Nacional propuxo para sanción a tres persoas por acender bengalas e protagonizar distintos incidentes durante o partido que enfrontou ao R.C. Deportivo e ao Málaga C.F. o pasado 4 de abril no estadio de Riazor. Nunha nota de prensa, a Policía explica que se estableceu un dispositivo especial de seguridade debido a que o encontro fora declarado de alto risco.
UN AFECCIONADO ACENDEU UNHA BENGALA E DEU POSITIVO EN ALCOHOLEMIA
No marco deste operativo, os axentes detectaron unha persoa que acendera unha bengala de sinalización marítima durante o recibimento ao equipo coruñés antes do comezo do partido. O home foi identificado xa dentro do estadio e, ademais, segundo indica a Policía, presentaba signos de embriaguez, polo que se lle realizou unha proba de alcoholemia na que deu un resultado de 0,28 mg/l. Por todo iso, procedeuse á súa expulsión do estadio e a instruír unha proposta de sanción polo uso de material pirotécnico e por atoparse baixo os efectos de bebidas alcohólicas.
OUTRO HOME ENTROU SEN ENTRADA TRAS SALTAR OS TORNOS
Así mesmo, sobre as 18.30 horas, foi identificado un home que accedera ao estadio sen entrada, despois de saltar os tornos de control e empuxar ao vixiante de seguridade. Como consecuencia, foi tamén expulsado do recinto e proposto para sanción.
INCITACIÓN REITERADA Á VIOLENCIA NO INTERIOR DO ESTADIO
Xa ás 20.00 horas, no interior do estadio, os axentes identificaron un individuo que mantivo unha conduta “activa e reiterada de incitación á violencia no deporte”. Ao persistir na súa actitude, a Policía procedeu igualmente a propoñelo para sanción. A Comisaría Provincial da Coruña trasladou que continúa realizando xestións para a identificación de máis responsables e non descarta novas actuacións policiais.
