Novo programa este pasado xoves nas ondas da CUAC FM de SKPMotor, que nos serve para manternos ao día do mundo dos rallys. Comezaba, coma sempre,  co clásico “Momento do bache”, mencionando a fochanca detectada na Rotonda dos Bombeiros, e aproveitando para mencionar o “considerable” salario mensual de 8.739 € que gaña Pere Navarro, actual Director Xeral de Tráfico da DGT. A esta suma, hai que engadir as dietas que recibe polas súas funcións oficiais. En canto ao arranxo das estradas, deixámolo para outro día.

Viaxaron á vila lucense de Taboada, que esta fin de semana celebra a 12ª edición da súa famosa Subida de Montaña Taboada, a primeira proba clasificatoria para o Campionato Galego de Subida de Montaña, cun percorrido de 3.300 metros. Na LU-611, falamos con Miguel Ratón, presidente da Escudería Taboada, a organizadora deste evento.
Ademais de presidente, Miguel é tamén o director de carreira, e falounos das melloras realizadas no percorrido de subida, incluíndo a reasfaltadura e a instalación dunha dobre barreira de seguridade. Un total de 65 pilotos estarán na liña de saída o sábado ás 13:00 horas.

Repasamos o calendario de eventos de automobilismo do fin de semana, cunha especial atención ao 33º Autocross de O Castro, que se celebra o sábado 25 no Circuíto de Taragoña en Rianxo, con 57 pilotos inscritos nas catro categorías.

Tamén falamos con Dani Berdomás, piloto coruñés e gañador do 40º Rally de Noia celebrado o pasado fin de semana, xunto co seu inseparable copiloto, Brais Mirón, veciño de Noia e moi coñecedor das etapas deste lendario rally do Campionato Galego. Dani e Brais foron os gañadores da edición do ano pasado. Berdomás cóntanos a súa rápida adaptación ao Citroën C3 Rally2 que pilotará esta tempada, o mesmo coche co que gañaron o Rally do Cocido de Lalín o 7 de marzo. Lembrámosvos que recentemente competiron no Campionato de España de Rallys de 2025, onde acadaron un meritorio terceiro posto con 128 puntos, o dobre que o cuarto clasificado.

Ademais, a tortilla foi cortesía de Víctor do Restaurante O Garabullo da rúa Ángel del Castillo da Coruña.

Podes escoitar o programa premendo esta ligazón ou acceder a todos os seus programas no seu espazo en www.cuacfm.org. E tamén podedes seguir tamén a través das redes sociais en Facebook e Instagram @escapemotor.cuac.