Dous acusados de agredir a Yoel Quispe —o mozo de 22 anos falecido tras recibir varias puñaladas na Noitevella de 2023 na contorna da rúa Juan Flórez, en A Coruña— aceptaron unha condena de nove meses de prisión, con suspensión, no xuízo celebrado este martes no Penal número 3 da Coruña.
En principio, a Fiscalía pedía un ano de cárcere para cada un deles polos feitos ocorridos sobre as 06.30 horas do 24 de decembro de 2023 na confluencia das rúas Sinfónica de Galicia e Juan Flórez da Coruña. No transcurso dunha “pelexa”, segundo o Ministerio Público, os agora condenados agrediron ao falecido “con reiterados puñoadres e patadas” provocándolle, entre outras lesións, “traumatismos na cabeza”. Yoel morreu unhas horas despois pola puñalada mortal que se atribúe ao único detido e encarcerado por estes feitos.
Tras un acordo de conformidade entre as partes personadas —Fiscalía, as acusacións particulares exercidas polo pai e pola nai da vítima e as defensas—, os dous mozos aceptaron unha pena de nove meses de prisión por un delito de lesións, fronte á petición inicial dun ano do Ministerio Público, e o abono de 1.500 euros en concepto de responsabilidade civil. Ademais, acordouse suspender a condena por un prazo de dous anos condicionado ao pago desa responsabilidade civil e a que non cometan novo delito.
A NAI ESIXE XUSTIZA
Visiblemente emocionada, a nai de Yoel, Maritza Yovana, manifestou a súa disconformidade. “Matáronme ao meu fillo; desde o primeiro momento pedín xustiza, non foron tres, foron máis”, reiterou nas súas declaracións aos medios. “É unha dor inmensa”, dixo entre bágoas, e anunciou que loitará ata o último intre “para que a morte do seu fillo non quede impune”.
O seu avogado subliñou que, para esta parte, “trátase dun homicidio”, motivo polo que non o cualificaron como lesións. “Estamos ante unha única unidade de acto”, afirmou, e avanzou que presentarán ante a Audiencia Provincial un recurso de nulidade das actuacións.
XUÍZO POR ASASINATO EN XUÑOç
Mentres tanto, do 1 ao 19 de xuño a Audiencia Provincial da Coruña celebrará, polos feitos ocorridos na Noitevella de 2023, outro xuízo no que sentaran en banquillo tres mozos. Fronte á postura da Fiscalía, que solicita 14 anos de prisión por homicidio para o único mozo que está no cárcere e o sobreseemento da causa para outros dous, a familia sostivo desde o inicio que os tres debían ser xulgados por asasinato.
Con respecto ao grao de implicación, consideran autor material do asasinato ao mozo que está na prisión e cooperador necesario ao que, segundo esta parte, “levaba a navalla deulla” ao primeiro, con implicación tamén dun terceiro. Así o recolle tamén o auto, que cualifica ao presunto autor da puñalada mortal como autor de asasinato; ao segundo como cooperador necesario dun delito de asasinato; e ao terceiro como encubridor dese mesmo delito, o que supón unha variación nas penas, que segundo o avogado da familia poderían chegar ata os 25 anos de prisión para os dous primeiros, e a tres anos para o terceiro.
Pola súa banda, as defensas no procedemento pedían o sobreseemento. Finalmente, no auto, a titular do xulgado de instrución acordou a apertura de xuízo oral, con Tribunal do Xurado, por asasinato, como solicitaba a familia, e non por homicidio, como pedía o Ministerio Público para un deles.
