O Colexio Oficial de Médicos da Coruña presentou unha nova campaña de charlas sobre educación sexual dirixida a adolescentes que, baixo o nome ‘Risco Cero’, pretende mellorar a información sobre métodos de anticoncepción, prácticas sexuais seguras e como evitar as enfermidades de transmisión sexual. O proxecto está promovido pola entidade colexial, en colaboración coa Fundación San Rafael, a Unidade de Coordinación Docente dos alumnos de Medicina e a Unidade de Docencia de Medicina Familiar e Comunitaria da área sanitaria da Coruña e Cee.
Durante os talleres celebrados en institutos, os relatores, estudantes de Medicina e residentes de Medicina Familiar e Comunitaria, explicarán aos mozos a importancia de manter relacións sexuais seguras para previr enfermidades de transmisión sexual e evitar embarazos non desexados. As charlas desta nova edición xa comezaron na Coruña e a súa área metropolitana e, ao longo do ano, chegarán a diferentes centros educativos da provincia, tanto públicos como privados. O obxectivo, explicaron, é achegar a información ao maior número de adolescentes posible e facelo a través de persoas novas coas que se sintan identificados.
Na rolda de prensa participaron o presidente e o vicepresidente do Colexio, Luciano Vidán e Javier de Toro, respectivamente; unha das impulsoras de ‘Risco Cero’, a médica de Atención Primaria Ana Zamora; unha das voluntarias que colaboran co proxecto, Ana Serantes, alumna de sexto curso de Medicina; e o coordinador de docencia do Complexo Hospitalario Universitario da Coruña (CHUAC), Juan Carlos Vázquez Varro.
“DRAMÁTICO” INCREMENTO
Os facultativos mostraron a súa preocupación polo “dramático” incremento das enfermidades de transmisión sexual, especialmente entre os máis novos. Segundo os datos da Consellería de Sanidade, os casos destas patoloxías multiplicáronse na última década en Galicia, cun aumento especialmente acusado entre os menores de 24 anos. A clamidia, fundamentalmente en mulleres novas, a gonorrea e a sífilis son as infeccións que máis creceron, un repunte que os profesionais sanitarios vinculan coa perda de sensación de risco e o descenso no uso do preservativo.
