Potentes imaxes das manifestacións desenvoltas onte co gallo do primeiro día (dos tres convocados) de folga por un convenio digno no siderometal, un sector que dá emprego a máis de 15.000 persoas na provincia. A máis multitudinaria, a vivida na Coruña con centos de persoas percorrendo o treito que une A Grela (Avda. de Arteixo con Enrique Salgado Torres) e a Praza de Luís Seoane, diante da sede de patronal.
As centrais sindicais cualifican de rotundo éxito o seguemento, que provocou que as empresas máis importantes dos polígonos de Alvedro, Sabón ou Agrela se mantivesen echadas e a actividade industrial dos principais polígonos paralizada. “Nas empresas de cen ou máis persoas traballadoras da comarca o seguimento é practicamente total, nas de menos de cen que están organizadas sindicalmente hai un seguimento de arredor do 80% e nas firmas e talleres máis pequenos é difícil facer unha cuantificación”, aseguran dende CIG-Industria Coruña.
CIG, CCOO e UGT reiteran que non van tolerar que sexa o persoal quen pague esta conxuntura nin un retroceso nos dereitos laborais conquistados tras moitos anos de negociación e loita, “mentres as empresas continúan incrementando os seus beneficios”.
Os sindicatos lembran que as demandas sociais son “realistas e razoábeis” e pasan por cuestións tan básicas como un incremento salarial digno, reducir a xornada laboral, regular os pluses, combater a precarización a través das ETT e dos contratos fixos descontinuos, mellorar os complementos das baixas médicas, limitar a subcontratación en cadea, etc.
