Adif Alta Velocidade ultima a nova zona de vías e plataformas da estación da Coruña, que quedará finalizada nas próximas semanas, o que supón o inicio da última fase das obras de ampliación e remodelación da terminal. No proxecto estanse investindo 86,7 millóns de euros e aborda xa a súa recta final. A execución da nova zona ferroviaria, con seis vías e tres plataformas, atópase nunha fase moi avanzada e abordará a partir do 6 de xuño os últimos traballos necesarios para a súa configuración definitiva, adaptada aos servizos de Alta Velocidade e os tráficos do Eixo Atlántico.
Unha vez finalicen as tarefas, o servizo continuará prestándose desde a estación provisional ata a posta en servizo definitiva da terminal, aínda que xa coa estrutura de vías final e baixo a nova marquesiña, emblema da remodelación. Esta peza é unha estrutura de aceiro de 9.884 metros cadrados de superficie que cubrirá con 200 metros de lonxitude e 48,5 metros de anchura a nova área, construída na ampliación do recinto cara ao sur (lado Santiago). Sustentada mediante alicerces de formigón de 11,6 metros de altura, supuxo un desafío técnico no que se empregaron dous guindastres de 250 toneladas e plataformas de ata 40 metros de altura para izar os elementos.
Para facer posibles estes traballos de sinalización e comunicacións ferroviarias, a estación da Coruña comezará este venres, 5 de xuño, máis dun mes de cortes por obras, un período no que Renfe fretará autobuses para os desprazamentos.
A primeira fase estenderase desde este venres ata o 25 de xuño. Os trens rexionais A Coruña-Vigo Guixar e os de Media Distancia A Coruña-Lugo e A Coruña-Ferrol realizarán transbordos por estrada. Concretamente, os rexionais farano desde a cidade herculina ata Santiago de Compostela, e os outros dous desde A Coruña ata Betanzos-Infesta, en ambos os sentidos. Ademais, por necesidades de rotación de material, o último tren Madrid-A Coruña do día 25 de xuño tamén fará por estrada o tramo Santiago de Compostela-A Coruña.
A interrupción total do tráfico chegará coa segunda fase das obras, que arrinca o 26 de xuño e durará ata o 10 de xullo. Renfe facilitará a mobilidade en autobús entre A Coruña e Santiago de Compostela para trens rexionais, Media Distancia, Avant e Alta Velocidade. Tamén se aplicará o plan por estrada entre A Coruña e Betanzos-Infesta para trens de Media Distancia da liña A Coruña-Lugo-Monforte-Ourense e A Coruña-Ferrol. Por necesidades operativas de situación de material rodante, os primeiros servizos da mañá do 11 de xullo tamén poden verse modificados.
