O Tribunal Superior de Xustiza de Galicia (TSXG) ratificou a condena a catro anos e dous meses de cárcere imposta pola Audiencia Provincial da Coruña ao condutor que chocou o día de Noiteboa de 2020 contra un vehículo no que viaxaba un matrimonio, que faleceu a causa do impacto. O tribunal considerouno autor de dous delitos de homicidio por imprudencia grave, un delito de lesións por imprudencia grave e delitos contra a seguridade viaria. Ademais da pena de prisión, o fallo impón a privación do dereito a conducir durante seis anos e dous meses.

A sala sostivo que o acusado, ao conducir a unha velocidade superior a 120 quilómetros por hora nunha vía urbana cun límite fixado en 50 quilómetros por hora, impactou contra outro coche, o que provocou a morte instantánea das dúas persoas e causoulle lesións de gravidade a unha terceira. Con esta resolución, o alto tribunal galego rexeita o recurso presentado polo condenado e descarta, entre outras cuestións, que existise calquera tipo de erro na valoración da proba efectuada polo órgano de instancia.

Pola contra, o TSXG estimou parcialmente o recurso interposto pola familia das vítimas. Deste xeito, os maxistrados condenan ao procesado ao pago dunha indemnización económica tamén para os irmáns dos dous falecidos, fixando dita contía en 2.540 euros.