A Universidade da Coruña participa no proxecto europeo SENSOPAD a través do grupo NANOSELF do Centro Interdisciplinar de Química e Bioloxía, o CICA. A iniciativa busca desenvolver novas ferramentas capaces de detectar sinais precoces da endometriose a partir da análise do fluxo menstrual. Segundo detallou a UDC nunha nota de prensa, a endometriose afecta aproximadamente a unha de cada dez mulleres en idade reprodutiva en todo o mundo. Porén, malia a súa elevada prevalencia, segue a ser unha doenza infradiagnosticada e difícil de detectar.

En concreto, a universidade sinalou que o tempo medio para obter un diagnóstico é de 7,5 anos desde a aparición dos primeiros síntomas, aínda que en moitos casos a espera pode prolongarse ata unha década. Neste contexto, o proxecto combina dúas tecnoloxías complementarias. A primeira consiste nunha compresa intelixente capaz de detectar proteínas asociadas á endometriose directamente durante a menstruación e de avisar a usuaria de posibles sinais da doenza. A segunda tecnoloxía, denominada sensoMFgFET, é un dispositivo portátil baseado en grafeno capaz de identificar biomarcadores presentes nas mostras menstruais cunha gran sensibilidade.

Este dispositivo emprega transistores de efecto de campo modificados quimicamente para recoñecer biomarcadores específicos da endometriose e transformalos nun sinal eléctrico medible. Desde a UDC subliñan que o proxecto non pretende substituír o diagnóstico médico, senón ofrecer ferramentas que permitan orientar máis rapidamente as pacientes cara a unha avaliación clínica especializada. A iniciativa abre así unha vía para avanzar na detección temperá dunha doenza que continúa a ter un forte impacto na saúde e na calidade de vida de moitas mulleres.