Segue Curtis recoñecendo o legado do Tío Benito do Santo. Esta fin de semana, o Concello de Curtis celebrou o acto de cambio de nome da rúa Ambulatorio, no núcleo urbano de Curtis, que pasou a chamarse rúa Tío Benito do Santo. A homenaxe rendeu recoñecemento a Benito Seoane Paredes, persoeiro ilustre da vila. O evento contou coa presenza de familiares e incluíu o descubrimento da nova placa. Foi Emilia Seoane (“Piruca”), bisneta de Tío Benito do Santo, a que falou en nome da familia.
Benito Seoane Paredes (1859-1938), coñecido cariñosamente como o Tío Benito do Santo, foi un benefactor que fomentou o desenvolvemento da vila desde a súa posición de propietario. Doou terreos para poder construir infraestruturas básicas para a parroquia de Nosa Sra de Lourdes, demostrando un marcado compromiso co ben común, o desenvolvemento de Curtis e a prosperidade dos seus veciños e veciñas. Grazas á súa colaboración desinteresada, a localidade puido dotarse de servizos básicos.
A súa figura segue a ser emblemática e moi querida na vila, onde a transmisión oral das xeracións e os ensaios históricos locais mantiveron viva a súa memoria. Co cambio de nome da rúa, o Concello pretende poñer en valor o seu legado e o sentir da veciñanza.
Máis novas
Curtis xuntou a varias xeracións para render unha nova homenaxe ao Tío Benito do Santo
