Nova noite de San Xoán a vivida na Coruña. Unha das citas máis especiais do ano na vila herculina, que este ano se viviu un pouco máis nos barrios que nos propios areais.
As rúas de toda a cidade estaban ateigadas de pequenas barbacoas onde as sardiñas e o churrasco tomaban protagonismo dende a tardiña.
Os datos oficiais de afluencia ata a medianoite indican que houbo máis de 200.000 persoas de celebración, a metade delas, nas praias da cidade; e outras 100.000 contabilizadas nas celebracións repartidas polos diversos barrios da Coruña.
Nos barrios, as xentes pinchaban as redes para ver que pasaba no Palacio dos Deportes, onde nun horario lamentable, o Liceo caía nos penaltis a finalísima da OK Liga, facendo aínda máis negra a lenda deportiva do San Xoán na Coruña, despois daquel fatídico partido de Mallorca, no que o Dépor quedou ás portas de volver a 1ª División.
Xa ás 0:00h, mentres nos barrios xa se saltaban as pequenas cacharelas, prendeu a falla que este ano homenaxeaba a clubs Real Club Deportivo, o Básquet Coruña, o HC Liceo, o Club Voleibol Ciudad de A Coruña, o Maristas, o Marineda Hockey e o Victoria.
Poucas incidencias
A Coruña encabezou a lista de incidencias na noite de San Xoán, cun total de 72 incidencias ao longo da noite, seguida de Vigo, con 27.
Entre as actuacións máis salientables da noite figuran varias intervencións sanitarias por queimaduras sufridas en fogueiras. Así, ás 00:17 horas, un menor resultou ferido na Coruña tras caer sobre unha cacharela, sufrindo queimaduras nunha man e nunha perna. Xa de madrugada, ás 04:27 horas, outra muller precisou asistencia sanitaria na Coruña ao caer nunha cacharela e quedar imposibilitada para camiñar.
A mañá…
A estampa matutina non foi tan grave como a doutros anos. A campaña intensiva municipal por achegar os contedores ata o propio areal, ou as iniciativas como as do colectivo @arenalimpia de poñerse a limpar ás 5:00h, permitiron que ás 7:00h a imaxe do areal fose lamentable, pero non tan grave como outros anos.
Os equipos de limpeza traballaron dende moi cedo para que a praia xa estea accesible nesta xornada de calor.
