A V Feira do Libro Anarquista da Coruña (FLAC), organizada por Refuxios da Memoria, Bastiana Editora, Ardora (s)ediçons anarquistas, o Seminario de Estudos Libertarios Galegos (SELG) e Xesta Organización Anarquista Galega, toma este ano o anarquismo e país como fío condutor da súa programación, que ao longo de case unha semana porá sobre a mesa debates arredor da cuestión nacional e o independentismo aplicados á Galicia actual.
O encontro, que se celebra principalmente na praza de San Andrés, combina como en edicións anteriores presentacións editoriais, mesas redondas, un mercado do libro con máis de vinte postos e unha exposición comisionada pola CNT.
Feira de libros
Ao longo da fin de semana funcionará o mercado do libro, con máis de vinte postos editoriais e de colectivos, instalado na contorna de San Andrés. O horario será de 11.00 a 21.00 horas o sábado 4 e de 11.00 a 15.00 horas o domingo 5. En caso de choiva, a feira trasladarase ao Circo de Artesáns. Neste espazo do Circo é onde estará dispoñible durante todo o mes de xullo a exposición “Tinta: Unha historia do fanzine libertario” aberta no horario do propio Circo.
Venres 3 de xullo
A feira arrinca no Circo de Artesáns (rúa San Andrés, 36) coa inauguración, ás 19.00 horas, da exposición “Tinta: Unha historia do fanzine libertario”, coa que a CNT que percorre a produción fanzineira do movemento libertario desde 1976 ata hoxe. Unha hora despois, ás 20.00, terá lugar a mesa redonda “Independentismo, quo vadis?”, primeiro dos espazos de debate centrados na temática desta edición coa colaboración interxeracional de militantes deste movemento.
Sábado 4 de xullo
A xornada do sábado, na praza de San Andrés, ábrese ás 12.00 horas coa relatorio “El Porvenir e o pensamento do soberanismo galego primixénio”, a cargo de César Caramés, e continúa pola tarde, ás 16.00, coas presentacións de “Londres Sarajevo” e “Los perros de Tánger”.
Ás 17.00 horas chega un dos momentos centrais da feira: o diálogo entre revistas anarquistas, no que participarán SELG, CEAG, Estudios, Esporas e A Ideia, cunha quenda individual para cada publicación antes do debate conxunto. Ás 19.30 horas será a presentación de “Razones de la revuelta” e, xa pola noite, ás 21.00, un espazo aberto na Cova Céltica (rúa Orzán, 82) para micropresentacións das editoriais.
Domingo 5 de xullo
O domingo, tamén na praza de San Andrés, o programa céntrase ás 12.00 horas na presentación de “Polas vítimas de onte, xustiza!”. A feira de libros, instalada desde o sábado, permanecerá aberta este día de 11.00 a 15.00 horas.
Xoves 9 de xullo
A actividade trasládase ao CS Gomes Gaioso (rúa Marconi, 9), onde ás 19.00 horas se celebrará a palestra “A hipótese colonial na Galiza de hoxe” en colaboración co Instituto Clara Corbelhe de Estudos Críticos Galegos, na uqe participarán Diego Sande Vega, Xesta Organización Anarquista Galega e a Coordinadora da Mocidade Socialista.
Venres 10 de xullo: Día das Mapoulas
A FLAC pecha, como no ano anterior, co Día das Mapoulas, que comezará na rúa Pedro Galván Calvete (detrás do cárcere) ás 19.00 horas. A xornada inclúe o tradicional roteiro polos espazos de memoria libertaria das Atochas-Monte Alto, que percorre os lugares vinculados á historia do movemento libertario neste barrio coruñés, este ano, centrado no antifascismo e a autoorganización veciñal.
