A alcaldesa da Coruña, Inés Rey, recalcou que a cidade herculina aposta por recuperar conexións nacionais na súa política aeroportuaria. Así o manifestou a preguntas dos medios de comunicación respecto da convocatoria por parte do Consorcio de Turismo e Congresos da Coruña para a licitación de rutas desde o aeroporto de Alvedro con Málaga, Valencia, Bilbao, Sevilla e Alacante.
“Convocarase para mañá ou pasado a Xunta do Consorcio de Turismo para aprobar esa licitación onde apostamos por recuperar esas conexións nacionais”, expuxo para engadir que se dotarán “estes novos contratos de maior duración”. O obxectivo, explicou, é que as mesmas “sexan máis rendibles e haxa máis estabilidade á hora de facer a planificación das rutas”.
Cuestionada polos tempos de adxudicación, avanzou que o goberno local tratará de “axilizalo o máis rápido posible”. No entanto, subliñou que “a lei ten uns prazos”.
ABORDARASE ESTE VENRES
A xunta de goberno do Consorcio de Turismo e Congresos da Coruña abordará este venres a aprobación da licitación de cinco novas rutas aéreas nacionais desde o aeroporto de Alvedro e dun convenio de colaboración con Inditex para a promoción turística da cidade. Segundo informou o Concello herculino nun comunicado, a iniciativa é froito da colaboración institucional entre o propio goberno local, o Consorcio de Turismo e a empresa galega, coa finalidade de mellorar e consolidar o posicionamento da urbe “como destino turístico, empresarial e congresual de referencia”.
A nova licitación incluirá cinco lotes correspondentes ás conexións directas con Málaga, Valencia, Bilbao, Sevilla e Alacante, mercados considerados “estratéxicos” para a cidade polo seu potencial turístico, económico e de negocio. “A mellora da conectividade aérea é unha cuestión estratéxica para o futuro da cidade porque nos permite atraer visitantes, facilitar as relacións empresariais e ampliar as oportunidades de mobilidade para a cidadanía”, reivindicou a alcaldesa, Inés Rey. Estas novas rutas suporán, por exemplo, máis de 200 voos e un mínimo de 37.440 prazas ao ano entre A Coruña e Málaga ou A Coruña e Valencia, así como 180 voos a Bilbao ou preto de 300 con Sevilla, entre outros.
INDITEX
Pola súa banda, o convenio con Inditex recolle que a empresa achegará 1,5 millóns de euros para a promoción turística da cidade. Este convenio estará en vigor nos anos 2026 e 2027 e será prorrogable un ano máis. Unha vez asinado este pacto, o Consorcio convocará un novo concurso para rutas internacionais semellante ao que se aprobará este venres para os destinos nacionais, engadiu o goberno local.
“A colaboración con Inditex volve demostrar que cando as institucións e empresas traballan na mesma dirección somos capaces de impulsar iniciativas que xeran valor para toda A Coruña. Este acordo permitirá afrontar con máis recursos retos estratéxicos relacionados coa promoción turística, cultural e económica da nosa cidade”, sentenciou Rey.
FEIRA DAS MARABILLAS
Foi tras a presentación de décimo terceira edición da Feira das Marabillas que se celebrará desde este mércores ata o domingo 26. A Cidade Vella encherase de música, teatro, pasacalles, espectáculos de lume, artesanía e gastronomía para recrear o ambiente da Idade Media, explicou a rexedora. “Facía anos que non viamos tanta xente o primeiro día, supoño que é o preludio do que vai ser durante os próximos días”, avanzou a rexedora.
