A alcaldesa da Coruña, Inés Rey, apelou á colaboración público privada para a promoción turística tras un acordo con Inditex que permitirá “reforzar” a estratexia exterior da urbe herculina.
“É momento de agradecer e recoñecer a súa implicación e vinculación co desenvolvemento da cidade”, destacou. Fíxoo a preguntas dos medios de comunicación sobre a Xunta de goberno do Consorcio de Turismo e Congresos deste venres, onde se abordará a aprobación da licitación de cinco novas rutas aéreas desde Alvedro e dun convenio coa devandita compañía mediante o cal a multinacional achegará 1,5 millóns de euros.
“Debería ser exemplo para moitas grandes empresas, que as temos na Coruña e na área metropolitana, de como cooperando e traballando xuntos podemos facer que unha infraestrutura como o aeroporto de Alvedro siga despuntando e xerando valor e novas rutas e destinos“, expuxo.
Foi tras recalcar que a nova licitación inclúe as rutas nacionais a Málaga, Valencia, Bilbao, Alacante e Sevilla, mercados considerados “estratéxicos” para a cidade polo seu “potencial turístico, económico e de negocio”. En concreto, o Concello investirá nesta iniciativa 6,5 millóns de euros.
Ao mesmo tempo, a rexedora avanzou que “no seguinte lote, irán rutas internacionais que xa se irán detallando”. A este respecto, apuntou que “agora” non van concretar prazos.
