A Universidade da Coruña (UDC) confirmou a “necesidade dunha maior financiación estrutural” para a institución “desde hai anos”. Non obstante, negou que no Consello de Goberno celebrado o pasado venres “se falase de rescate”.
Así o manifestaron fontes da entidade académica consultadas por Europa Press a respecto das declaracións realizadas polo conselleiro de Educación, Ciencia, Universidades e FP, Román Rodríguez, quen considera que a situación económica da UDC é “preocupante”. En consecuencia, pediulle que poña en marcha medidas que posibiliten unha “xestión razoable” dos fondos públicos e un “equilibrio financeiro” nas súas contas.
A este respecto, explicaron que “a comezos de 2024, o actual equipo de Goberno da UDC fixo pública unha diagnose das contas da institución na que se reflectía a existencia dun Remanente Non Afectado acumulado de -13 millóns de euros, amosando a situación detectada coa máxima transparencia tanto coa Xunta como cos órganos de Goberno da UDC”. Así mesmo, engadiron, púxose en marcha un “plan de axuste”, no que “se recortou un 30% en todas as partidas de gasto”, entre outras medidas, “e xa nese momento se incidiu na necesidade dunha maior financiación estrutural para a Universidade”.
“A UDC está a captar unha importante cantidade de fondos, medrando con bos resultados nas convocatorias de concorrencia competitiva, proxectos estatais e internacionais, pero eses son fondos finalistas que non se poden destinar ao pagamento de gastos de persoal, mantemento de edificios, materiais de docencia ou arranxo de inmobles”, concretaron.
Por iso, destacaron como “clave” mellorar o sistema de financiación estrutural, é dicir, o que permite facer fronte aos gastos básicos que ten a institución. “En ningún momento, no Consello de Goberno celebrado o pasado venres se falou de rescate”, recalcou.
“SITUACIÓN COMPLEXA”
Neste sentido, expuxeron que o que se tratou no órgano de Goberno foi a liquidación das contas de 2024, xa auditadas, que “ratifica a situación complexa á que debe facer fronte a Universidade e as vías de traballo que se estaban desenvolvendo”. “As universidades públicas debemos contar cunha liña de financiación estrutural maior, que permita desenvolver a actividade con normalidade“, urxiron.
“Por tanto, desde a UDC agardamos da Consellería a mesma lealdade coa que vimos traballando conxuntamente desde o principio neste tema e para o que hai creado un grupo de traballo coordinado pola Xunta”, engadiron para incidir en que se refire a “infrafinanciamento da institución pública”, unha situación que, recalcou, “lastra a súa saúde financeira a medio e longo prazo”.
A este respecto, detallaron que a entidade puxo en marcha un “plan de reequilibrio financeiro que está dando resultados, pero que non é suficiente”.
