Este sábado arrincou o mes de agosto na Coruña, o mes onde pasa todo. Lucía Veiga, co seu sentido e comprometido pregón daba conta do comezo das Festas de María Pita 2026, e con elas a Feira do Libro e a MostrArt, e os próximos Fesstival Noroeste e Viñetas dende o Atlántico.
No seu pregón, Lucía Veiga reivindicou a identidade coruñesa como unha forma de pertenza que vai moito máis alá da orixe. A actriz apelou ao sentimento compartido de quen escollen a cidade como fogar e defendeu que ser coruñés ou coruñesa “é unha cuestión dealma, unha elección, un sentimento”. A pregoeira mesmo asinou un termo: CTA, ou coruñés/a de toda a alma. Veiga lembrou que todas as persoas que cruzan a Ponte Pasaxe “corren o perigo de quedar prendidas desta cidade” e destacou a capacidade da Coruña para conquistar a quen a habita.
A pregoeira, natural dos Mallos, puxo tamén en valor o carácter aberto, resiliente e acolledor da cidade, reivindicando a cultura como un elemento esencial da vida colectiva. “Cultura sempre”, proclamou durante a súa intervención, animando a coruñeses e coruñesas a non renunciar nunca a ela por ser unha ferramenta que “abre as mentes e ensancha os corazóns”.
De contado, outra ilustre herculina como Luz Casal, foi encargada de abrir o programa das Noites de María Pita ante unha praza chea de público. A cantante galega presentou en directo ‘Me voy a permitir’, o seu último espectáculo.
Feira do Libro e MostrART
A apertura de Mostrart e da Feira do Libro da Coruña marcaba tamén un fito no ano herculino. Ao longo de todo o mes de agosto, os Xardíns de Méndez Núñez, aínda afectados polas obras dos Cantóns, acollen os postos da 42ª edición da mostra de Artesanía… Ata o 30 de agosto, os Xardíns de Méndez Núñez acollerán máis de 65 artesáns e artesás distribuídos en 45 casetas, cunha ampla representación da artesanía contemporánea galega e estatal.
Tamén tivo lugar a Feira do Libro da Coruña, que permanecerá aberta ata o 10 de agosto coa participación de 38 librarías da cidade e do conxunto de Galicia. Bea Lema foi a pregoeira.
Noroeste e moito máis
Mentres María Pita seguirá enchendo a praza cada noite con actuacións, este mércores arrinca unha das citas máis esperadas do ano. Malia esquecer, incomprensiblemente, as sesións vermú do venres e sábado, esta 39ª chega variada e moi coruñenta.
O mércores 12 de agosto (ás 20:28) chega outra das citas marcadas en vermello no calendario: a eclipse total, con Coruña sendo un dos mellores sitios do planeta para gozalo na súa totalidade, a pesar da contraprogramación do Teresa Herrera, que enfrontará ao Dépor e ao Real Madrid ás 21:00h.
Ademais, o 14 e 15 de agosto toca o Festival Electrónica Coruña no Parque de Santa Margarida.
Toda a info:
- Programa completo das Festas de María Pita.
- Programa completo do Festival Noroeste.
- Programa completo do Viñetas dende o Atlántico.
- Programa completo da Feira do Libro.
- Programa completo do FEC
Máis novas da Axenda herculina
O Festival Noroeste presenta a súa programación por días e espazos
En marcha a edición máis social e reivindicativa da historia do Viñetas do Atlántico
A Coruña volve ser epicentro de música electrónica cunha nova edición do FEC
