A Xunta sorteará o vindeiro 9 de setembro un total de 50 vivendas de promoción pública que constrúe na parcela Z-38, no barrio coruñés de Xuxán, destinadas a alugueiro accesible. O Diario Oficial de Galicia publica este martes o anuncio de inicio do procedemento e os requisitos para a adxudicación destes inmobles. Do total das vivendas, 19 estarán reservadas para menores de 36 anos, o que representa o 40 % da promoción.

SORTEO ANTE NOTARIO

A adxudicación realizarase mediante un sorteo ante notario entre as persoas inscritas no Rexistro de Demandantes de Vivenda que teñan o concello da Coruña como municipio preferente. Entre os requisitos establecidos figura residir ou traballar na Coruña. As persoas solicitantes tamén deberán acreditar uns ingresos ponderados por unidade familiar ou convivencial de entre 0,7 e catro veces o indicador público de renda de efectos múltiples (IPREM). No caso das familias numerosas, o límite máximo de ingresos poderá alcanzar 4,5 veces o IPREM.