Os que xa temos unha idade nesta cidade non lembramos un verán coma este. Non lembramos baixar as Noites de María Pita ou mesmo ao Pop-Rock de Riazor sen unha rebequita, como rezaban os mandamentos das nosas nais. Non lembramos durmir coa fiestra aberta e sen colcha. Non lembramos pasar frío volvendo da auga ás Terceiras do Orzán.
Pero apenas nesta penúltima semana de agosto a cidade comezou a vivir nunhas temperaturas habituais para este refuxio climático. Porque os datos deixan claro que estamos ante un verán atípico. Segundo nos contan dende InforMET, o mes de xullo de 2026 comportouse de maneira extremadamente cálida e moi seca. De feito, a temperatura media do mes foi de 21,8 °C, o que supón unha anomalía positiva de 2,3 °C respecto ao período de referencia
1996-2025. Ademais, a precipitación total foi un 93% inferior ao normal no mes de xullo das últimas dúas décadas.
En conxunto, o mes clasifícase como extremadamente cálido ao superar o máximo do período de referencia das dúas últimas décadas. Avaliamos con eles o informe meteorolóxico que recolle os datos observados por AEMET.
As temperaturas mínimas
Os datos das temperaturas son tremendos, alcanzando o 5 de xullo os 33,9º. Pero máis que fixarnos nas temperaturas máximas, cómpre poñer o foco nas temperaturas mínimas. Ese mesmo 5 de agosto, os 20,2º de temperatura mínima sitúase entre as 10 máis cálidas da serie histórica de xullo.
I é que A Coruña non baixou durante xullo dos 17,2º, as temperaturas mínimas rexistradas ao longo do mes os días 7 e 26. E a temperatura mínima media en xullo de 2026 foi de 18,3 °C. O valor normal para este mes é de 16,3 °C, o que supón unha anomalía de +2,0 °C.
Un aumento que se nota tamén nas máximas, alcanzando unha media de 25,2 °C (o anterior récord foron os 24,5º de 2006). O valor normal para este mes é de 22,6 °C, o que supón unha anomalía de +2,6 °C, e a media do mesmo 5 de xullo, os 27,05 °C, sitúase entre as 10 máis cálidas da serie histórica do mes.
Apenas 2 días de precipitacións
Durante xullo só choveu 2 días, cando o habitual é que choivan 9 días. A precipitación acumulada durante xullo de 2026 foi de 2,0 mm, fronte aos 30,0 mm normais para este mes, explican dende InforMET. A anomalía resultante de- 28,0 mm (- 93%) sitúa ao mes no percentil 7,2, o que permite clasificalo como un mes moi seco en termos de precipitación acumulada.
Na serie histórica, a precipitación total de xullo de 2026 sitúa ao mes entre os máis secos. Ordenando das máis secas ás máis chuviosas, ocupa a posición 4 de 96.
O semestre máis cálido
InforMET avalía tamén os datos do período xaneiro-xullo, que se sitían como o máis cálido da historia cunha temperatura mínima media de 12,7º, por riba dos 12,5º do ano pasado, e contrapoñéndose cos 11,8-11,9º da media dos anos 90.
Outras gráficas 
