O Ministerio de Transportes e Mobilidade Sustentable iniciará este mércores unha nova fase das actuacións que se desenvolven na avenida de Alfonso Molina, na Coruña, coa modificación provisional da disposición das paradas de autobús para adaptalas aos percorridos peonís habilitados durante as obras.
Estes traballos obrigarán a pechar temporalmente o acceso á AC-11 desde a rúa Lamelas. A restrición manterase ata que finalicen as actuacións previstas neste punto e implicará o desvío dos vehículos que habitualmente empregan esta incorporación.
Como alternativa, o tráfico deberá acceder á AC-11 a través da avenida García Sabell, segundo informou o Ministerio. Este percorrido permitirá conectar de novo coa principal vía de entrada e saída da cidade mentres permaneza clausurado o enlace desde Lamelas.
GARCÍA SABELL, ITINERACIO ALTERNATIVO
Transportes sinala que a incorporación actual desde a rúa Lamelas á avenida de Alfonso Molina conta cun carril de aceleración de pouca lonxitude, unha configuración que dificulta que os vehículos poidan incorporarse con rapidez á AC-11.
Esta circunstancia provoca que, mesmo antes do corte previsto polas obras, unha parte importante dos condutores da zona opte xa pola avenida García Sabell como itinerario para acceder á AC-11.
Para informar dos cambios, o Ministerio instalará unha barreira no acceso desde a rúa Lamelas, que impedirá fisicamente a incorporación á avenida. Tamén se colocará sinalización nos puntos necesarios para advertir da restrición e indicar aos condutores o percorrido alternativo.
