O complexo deportivo de Acea de Ama, en Culleredo, estreará desde este luns os espazos renovados na primeira fase dun proceso de reforma que supuxo un investimento de 2,15 millóns de euros. As actuacións afectan a distintas zonas das instalacións e buscan ampliar as posibilidades de uso e actualizar o equipamento dispoñible para as persoas usuarias.

O conselleiro de Presidencia, Xustiza e Deportes, Diego Calvo, visitou o complexo acompañado polo secretario xeral para o Deporte, Roberto García, para coñecer o resultado dos traballos executados ata o momento.

A intervención permitiu actuar tanto nos espazos destinados ao adestramento individual como nas salas nas que se desenvolven actividades colectivas. Entre as principais modificacións figura a ampliación e remodelación da sala de musculación e fitness, que foi equipada con nova maquinaria deportiva.

Os aparellos incorporados á zona de fitness dispoñen dun sistema conectado a un programa informático que permitirá ás persoas usuarias rexistrar e seguir as súas rutinas de exercicio. A reforma inclúe tamén a creación dun novo circuíto de adestramento dentro desta área.

As salas destinadas ás diferentes actividades deportivas foron igualmente renovadas e contan agora con novo material e equipamento, dentro dunha actuación coa que se pretende mellorar as condicións de práctica deportiva no complexo.

A Xunta prevé ademais reforzar o persoal da sala de fitness, coincidindo coa posta en funcionamento dos espazos renovados.