O portavoz do grupo municipal do PP no Concello da Coruña, Miguel Lorenzo, cualificou de “desastrosa” a xestión da alcaldesa, Inés Rey, en materia de vivenda, asunto polo que levará preguntas ao próximo pleno, igual que sobre mobilidade e seguridade cidadá, ao entender que esta última se agravou. “Inés Rey está a botar abaixo o mercado da vivenda coa zona tensionada”, dixo, en rolda de prensa, sobre a declaración desta. “Non fixo ningunha vivenda para familias, non convoca axudas para rehabilitar ou instalar ascensores”, sinalou.

“Con este bagaxe desastroso pide xestionar fondos“, engadiu sobre a solicitude do Concello nese sentido para asumir a xestión dos que o Goberno central transferirá á Xunta. Xa en materia de mobilidade, denunciou “atascos nos accesos, sen aparcadoiros e un autobús sen contrato”, explicou ao adiantar as preguntas orais que levarán á próxima sesión plenaria.