No marco das mobilizacións arredor da problemática da vivenda (con manifestación convocada para este sábado) o BNG e Galiza Nova organizaron esta pasada tarde de xoves 1 de outubro un acto na Praza do Mercado de Monte Alto, co lema xenérico de “Garantir a vivenda, erradicar a crise”.
A candidata do BNG á Alcaldía, Avia Veira, foi precedida no uso da palabra polo militante de Galiza Nova, Adrián Lezcano e centrou o discurso na necesidade de urxir á Xunta a que transfira xa ao Concello da Coruña o diñeiro habilitado polo Estado para as cidades que foron declaradas como zonas tensionadas.
Foi precisamente un dos temas que se falou no pleno desa mesma mañá de xoves, no que Veira acusou o seu homólogo do grupo municipal do PP, Miguel Lorenzo, de “pór o PP e as ordes que recibe do señor Rueda por enriba das necesidades da Coruña”, tras votar en contra da moción que pedía solicitar á Xunta esa transferencia.
“Estamos a falar de 3,6 millóns de euros. O debate aquí é quen debe xestionar ese diñeiro, quen debe decidir como e onde se inviste. Obviamente, ten todo o sentido que o faga o Concello da Coruña e non unha Xunta que ten máis que demostrada a súa falta de vontade política á hora de promover a construción de vivenda pública”, alegou Veira, quen lembrou que desde 2009 os sucesivos gobernos de Feijóo primeiro e Rueda despois só entregaron 40 pisos na nosa cidade.
Para a candidata nacionalista á Alcaldía, os 3,6 millóns de euros “viríanlle moi ben á EMVSA, unha empresa municipal de vivenda que necesita recursos e vontade política para efectivamente ser un axente positivo na abordaxe da emerxencia habitacional que atravesamos”.
Máis novas
“Fóra rendistas dos nosos barrios”. Convocada unha manifestación pola vivenda para este sábado
Un pleno de acordos e desacordos sobre vivenda, escolas infantís e a Fundación Luís Seoane
