O concello avanza un novo modelo de xestión das colonias felinas da cidade. Así o anunciou a Concelleira Medio Ambiente, Yoya Neira, na terceira edición das Xornadas Urbandog, que organiza o Concello coa colaboración de Arión no Fórum Metropolitano.
Trátase dun modelo que permitirá coñecer con maior precisión a situación das colonias felinas, reforzar o seu seguimento e garantir unha actuación coordinada entre os servizos municipais, o voluntariado, as entidades colaboradoras e os profesionais veterinarios. Neira lembrou que o desenvolvemento da Lei 7/2023 de benestar animal atribúelle aos concellos a responsabilidade da xestión dos gatos comunitarios.
Entre as principais novidades destaca a realización dun mapeamento das colonias e dos gatos comunitarios existentes na cidade para proceder á súa identificación e seguimento, o que permitirá aplicar de maneira máis eficaz o método CER —captura, esterilización e retorno— e devolvelos ás súas colonias de forma controlada.
Así mesmo, a concelleira, malia ter deixado claro que “as colonias felinas non son unha prioridade para a súa concellería”, o novo modelo reforza a formación do voluntariado, que estará debidamente identificado e deberá asumir un compromiso nas súas funcións de alimentación, observación e comunicación de información sobre os animais. O obxectivo é dispoñer da maior cantidade de datos posible sobre cada colonia e facilitar unha resposta máis rápida ante calquera incidencia. Os cursos de formación, nos que xa hai 130 persoas inscritas, comezarán o vindeiro luns 5 de outubro.
O punto máis importante é a posta en marcha dun software específico para a xestión das colonias felinas, que permitirá xeolocalizalas, dixitalizar toda a información dispoñible e xestionar as incidencias en tempo real con maior transparencia e eficacia.
As protectoras de animais buscan axuda social para coidar as colonias felinas
