Esta mañá de mércores 10 de maio celebrouse unha nova Xunta de Goberno no Concello da Coruña. Un dos puntos da orde do día foi a concesión da licenza para a construción dun edificio de 88 vivendas, garaxe, rochos e un local, que estará situado na última parcela libre do polígono de Náutica, localizada entre as rúas Marcela e Elisa, Marqués de Cavalcanti e a avenida de San Roque de Fóra.
O orzamento previsto para a execución e material das obras, promovidas pola promotora de desenvolvementos inmobiliarios Kontiki, é de case 9,5 millóns de euros. Terán un prazo de seis meses para iniciar os traballos de construción, a partir da posta en marcha dos mesmos, 36 meses para rematalos.
Legalizando un edificio
Ademais, a Xunta aprobou a concesión da licenza para o proxecto de legalización do edificio situado no nº 13 da avenida de San Roque de Fóra. Sobre este edificio pende unha orde para a súa demolición total que vén a raíz dunha sentenza do Tribunal Superior de Xustiza de Galicia.
Porén, comunidade de propietarios presentou un proxecto arquitectónico que formula modificacións no edificio, co obxectivo de evitar o seu derrubamento. Este proxecto propón diversas intervencións como o apoio da estrutura para realizar as derrubas necesarias para cumprir a normativa vixente, a reconstrución da fachada principal segundo á aliñación e as determinacións do Plan vixente e o derrubamento dos voos desde a planta 1ª á 7ª, por cuestións legais.
Segundo o grupo de goberno, “con estas modificacións, e tras avaliarse o proxecto, o edificio adaptaríase á normativa vixente, coa redución de 61 metros cadrados da superficie total construída inicialmente”.
Desta forma, e ao concederse licenza para legalizar o edificio, abriríase un prazo de seis meses para iniciar as obras que contempla o proxecto.
