O Tribunal Superior de Xustiza de Galicia (TSXG) ratificou a condena imposta en primeira instancia contra o Servizo de Galego de Saúde (Sergas), que terá que indemnizar con 70.000 euros a unha muller lesionada tras ser sometida a unha intervención cirúrxica no CHUAC por un problema nas costas.

Nunha resolución contra a que cabe recurso de casación e que foi difundida este luns, o alto tribunal galego desestima os argumentos dos letrados da Administración autonómica contra a sentenza emitida en marzo de 2022 polo xulgado do Contencioso Administrativo da Coruña, que deu en parte a razón á reclamante, quen pedía inicialmente unha indemnización de 786.000 euros.

Agora, o TSXG fai súa a sentenza en primaria instancia e condena ao Sergas a abonar 70.000 euros a esta paciente, que sufriu complicacións da súa doenza de costas tras a operación, desde a cal sofre unha paraplexia.

Aínda que o tribunal recoñece que os problemas de columna que padecía terminaron nunha parálise de corpo e que a intervención buscaba frear o seu avance, a sala considera que o Sergas cometeu erros á hora de informar á muller antes da operación á que foi sometida na Coruña en setembro de 2016.

Ademais, tamén entende que houbo unha demora inxustificada no diagnóstico da doenza, que a levou a ser atendida no CHUAC en maio de 2016, pero que non foi determinante en que terminase con paraplexia.

Deste xeito, ratifica o dereito da paciente a ser indemnizada con 70.000 euros por danos morais.