O Boletín Oficial da Provincia (BOP) da Coruña publicou este luns a resolución provisional de subvencións a 130 clubs deportivos, que en total recibirán 1.011.742 euros por parte da Deputación. A maiores hai outros seis que, se presentan a documentación que se lles require, recibirán outros 60.000 euros.
Segundo informa a institución provincial, trátase dun programa para financiar os gastos derivados da participación en competicións oficiais federadas a nivel nacional e internacional. As achegas oscilan entre os 2.000 e os 6.550 euros e engloban modalidades deportivas variadas, tanto en categorías femininas como masculinas.
A responsable de Deportes da Deputación, Cristina Capeláns, destacou a importancia desta liña “para seguir impulsando aos nosos deportistas nas diferentes competicións” e “colaborando no seu progreso deportivo e promocionando o deporte coruñés en toda España e fóra das nosas fronteiras”.
Por outra banda, o presidente da Deputación da Coruña, Valentín González Formoso, asinou este luns co alcalde de Sobrado dos Monxes, Lisardo Santos, o convenio de colaboración para cofinanciar as obras de mellora do asfalto en oito camiños e pistas do municipio. O orzamento total da actuación ascende a 239.994 euros, dos que o goberno provincial achegará 191.995, o 80 por cento.
