A Federación de Atención á Cidadanía da Unión Sindical Obreira en Galicia (FAC-USO Galicia) denuncia coaccións, da empresa que xestiona o Centro Deportivo do Castrillón, aos seus empregados, para que asinen unha declaración.
O sindicato asegura que a empresa mantén “numerosos incumprimentos, reiterados, desde o principio, da adxudicataria, sen que, a día de hoxe, conste que fose advertida, nin sancionada, pero agora con derivacións penais”.
Por conseguinte, FAC-USO “emprenderá todas as accións legais oportunas co obxecto de
defender a nosa liberdade sindical e a dos nosos afiliados, que se viu vulnerada, o que implica o exercicio de todo tipo de recursos, denuncias, querelas, etc.”
Lembran que entre as irregularidades ao director xeral de EMVSA (Empresa Municipal de Vivenda Servizos e Actividades, S.A.), están:
– O contrato está caducado desde o mes de xuño (duración de 3 meses, e 2 máis de prórroga).
– Existen franxas horarias onde a sala de fitness, non conta con persoal técnico, ou este se atopa realizando outras funcións na piscina ou en información-recepción.
– Socorristas e monitores vense obrigados, en ocasións, a compaxinar, as dúas funcións, sen contar, no segundo caso, coa titulación requirida e necesaria.
– Traballadores/as realizan, en ocasións, xornadas continuas e ininterrompidas de ata 13 horas diarias durante as fins de semana e os días festivos.
– Traballadores/as non contan cos descansos legais pertinentes, entre xornadas e dentro da
propia xornada.
– Traballadores/as non cobran pluses (nocturnidade, perigo, toxicidade, etc.).
– Existen traballadores/as aos que non se lles aplica o “Convenio colectivo de instalacións deportivas e ximnasios da Comunidade Autónoma de Galicia”.
– O Centro Deportivo non conta, desde hai meses, co posto de director-coordinador, posto obrigatorio e estrutural, clave para o funcionamento, funcións que vén desempeñando unha monitora contratada para impartir actividades de fitness, que non conta nin coa experiencia requirida, nin tampouco coa titulación axeitada (intrusismo profesional).
