A Consellería de Infraestruturas e Mobilidade publica este martes no Diario Oficial de Galicia e no Boletín Oficial da Provincia da Coruña a convocatoria dos actos expropiatorios para a mellora de accesibilidade e conectividade de 55 paradas de autobús en estradas autonómicas de acceso á cidade herculina.

As obras, xa adxudicadas, suporán un investimento de case 1,4 millóns de euros, e permitirán actuar en paradas situadas nas estradas AC-400, AC-413, AC-414, AC-418, AC-424 e AC-552. En concreto, melloraranse 26 paradas no municipio de Arteixo, outras 3 na Coruña, 12 en Culleredo, 9 en Carballo, 2 en Cerceda, 1 en Malpica e 2 en Ponteceso.

Para acondicionar estas paradas hai que expropiar distintas parcelas nos municipios de Carballo, Culleredo, Ponteceso, Arteixo e Cerceda, mentres que no resto de casos as melloras fanse en zona de dominio público de estradas de titularidade autonómica.

O Diario Oficial de Galicia recolle que o acto de levantamento de actas previas á ocupación de terreos en Carballo e Culleredo fíxase para o 6 de novembro, mentres que en Ponteceso, Arteixo e Cerceda será o 7 de novembro. En ambos os casos citarase aos propietarios das leiras no salón de plenos dos respectivos Concellos.

Para o mes de xaneiro están convocados os actos de pago de depósitos previos e de formalización das actas de ocupación. No caso de Carballo e Culleredo os actos terán lugar o 24 de xaneiro, e o 25 de xaneiro faranse en Ponteceso, Arteixo e Cerceda.

As melloras nas paradas consistirán no acondicionamento dos carrís para a parada do autobús, a mellora da accesibilidade e a pavimentación da contorna, coa execución de sendas ou beirarrúas. Tamén se instalarán novas marquesiñas e varandas para protexer aos usuarios cando haxa desniveis.