Comezos do mes de decembro e o Goberno Local aínda non ten convocado o Consello Escolar Municipal. Así o denuncia o BNG, que lembra que a concelleira nacionalista Mercedes Queixas rexistrou un rogo oral para a súa lectura no Pleno ordinario deste mes, a se realizar o xoves 14 de decembro.
“Cómpre que se convoque unha reunión do Consello Escolar Municipal, un órgano participativo de toda a comunidade educativa da cidade, para avaliarmos o estado en que se achan os centros de ensino públicos na Coruña”, remarca Queixas.
Aproveita o BNG para lembrar os problemas que veñen manifestado varios centros, provocados polos recortes da Xunta como a eliminación de prazas de especialistas de educación especial, como por exemplo no CEIP María Barbeito ou no IES Ramón Menéndez Pidal.
Tamén sinala como “notarias” a falta de mantemento das infraestruturas, con varios colexios “cuxas edificacións son antigas e non dispoñen de espazos axeitados para o comedor escolar ou para práctica deportiva como é o caso do CEIP María Pita”.
O Consello Escolar Municipal, se for convocado, podería “avaliar a planificación das actuacións necesarias para a mellora da calidade do ensino público na Coruña” quer estas seren competencia do Concello quer da Consellaría de Educación.
Máis novas
ANPA RASA: “Os centros públicos están privatizados case durante media xornada lectiva”
