A Asociación Cultura Alexandre Bóveda é un verdadeiro foco cultural de vertixe, ata o punto que é complicado seguirlle o paso e poder publicarlle cada evento, cada acto. Pero elas xa non contan coa prensa, nin coas administracións para encher os auditorios, ou para encher as rúas. Bástalle a rede de fieis que disfrutan coas continuas actividades culturais que arman semana tras semana.
Sita no 1º do eterno e vivo Circo de Artesáns, a entidade gusta de sacar os seus eventos á rúa. Aínda o vindeiro 23 de febreiro sacará unha lectura colectiva ás portas do Teatro Rosalía polo Día de Rosalía, pero é que nunha mesma semana poden ter programa 5 ou 6 días. Sesións de Internacionalismo, de pintura, de lusismo, de lendas, de teatro, de resistencia cultural, de poesía, de arqueoloxía, presentacións de libros de aquí e dalá… (“hai que ofrecer eventos diversos”, explica María Xosé para ter sempre xente… E Roteiros Literarios.
Os Roteiros da entidade merecen un apartado especial. É aí cando María Xosé Bravo e Carmela Galego, presidenta e vicepresidenta, funden as súas experiencias, as súas cabezas comezan a carburar para armar eventos como o roteiro polos Xardíns de Méndez Núñez, no que a cousa se desbordou con máis de 200 persoas…
Paso a paso, persoa a persoa, relato a relato, vínculo a vínculo, non deixan pasar un só detalle para artellar cada evento, demostrando un agarimo, un compromiso, unha conexión extrema.
A web acorunaliteraria.gal
Falan do seu proxecto A Coruña das Mulleres, pero contan con especial agarimo o traballo realizado, “todo sempre con xente da casa”, na web acorunaliteraria.gal. Espazo que cumpre un ano nestas datas, e que recolle innumerables detalles da historia da nosa cidade, así como anécdotas curiosas (o crowfundind de Rosalía de Castro, por exemplo).
Espectacular é o material colleitado para facer o Mapa Literario, e máis aínda para a lista de roteiros literarios para os que ata ofrecen unha unidade didáctica perfilada para quen queira organizalo pola súa conta.
