Celebrouse esta noite de mércores 15 de maio a gala de entrega dos XXI Premios Martín Códax da Música 2024. A Asociación Músicas ao Vivo escolleu os proxectos gañadores destes “Grammy galegos”, nunha fermosa gala, emitida pola agalega e amenizada pola herculina Banda Xanghai do noso Xurxo Souto.
Era moi ampla a presenza coruñesa entre as 57 finalistas, se ben non tantos os premios que queda na cidade.
Quedou no camiño o premio para a Mardigras, pero o xurado escolleu como Mellor Sala de Galicia á ourensá A Arca de Noé. Quedou a eterna gaiteira de Cecebre, Susana Seivane, por detrás do dúo Caamaño&Ameixeiras na categoría de Folk. A Gramola Gominola no puido coa potencia de Uxía Lambona e a Banda Molona na categoría infantil. E o grupo Martíns Aneiros Band tampouco puido con Pablo Sanmamed Trío + Benxamín Otero.
![](https://xornaldacoruna.gal/wp-content/uploads/2024/05/Lucia-Aldao-recollendo-Premios-Martinn-Codax-2024.jpg)
Pero temos boas novas. Lucía Aldao leva o Premio á Música Pop e Indie. A cantante dos Mallos superou na final á revolución dos muradáns The Rapants e a banda ribeirense Mai.
Outro premio con acento coruño é de Blues, Funk e Soul, que recae no gran Brais Morán co seu novo proxecto Nasafunk.
E tamén nos congratulamos do premio de Músicas Urbanas, que leva a ceense/coruñesa Hydn, do selo Aaldea, co que falabamos esta mesma semana. O máis parecido á unha diva á galega, que non parará ata cantar na Lúa.
![Hydn recollendo o premio Martín Codax da Música 2024 de Músicas Urbanas](https://xornaldacoruna.gal/wp-content/uploads/2024/05/Hydn-ecollendo-Premios-Martinn-Codax-2024.jpg)
Tendes todos os premios xa no twitter @prmartincodax.
Máis novas
Repaso á presenza herculina entre os finalistas aos Premios Martín Códax da Música