O Concello da Coruña aprobou, na Xunta de Goberno local, a proposta de convenio para a cesión gratuíta do edificio da Terraza ao Ministerio de Transformación Dixital e da Función Pública, que albergará a sede da Axencia Española de Supervisión da Intelixencia Artificial (AESIA).
O texto asinarase mañá martes, 18 de xuño, por parte da alcaldesa da Coruña, Inés Rey, e do ministro de Transformación Dixital e da Función Pública, Jose Luís Escrivá, no Palacio de María Pita, segundo apuntou a rexedora, quen asegurou que “en breve” se acometerán tamén as actuacións de remodelación.
A aprobación do convenio enmárcase na relación de cooperación interadministrativa entre ambas as institucións, de acordo cos compromisos adquiridos polo Concello da Coruña tras a resolución do Consello de Ministros de 5 de decembro de 2022 polo que se determinou a cidade como sede física da AESIA.
Trátase dunha concensión gratuíta e temporal para o que se establece un prazo transitorio de 12 meses para que a Axencia poida ir ocupando os espazos que se consideren necesarios. O Concello comprométese a pór a disposición outros espazos públicos neste período transitorio, ademais de crear unha oficina municipal de benvida.
