Mobilízase o Concello de Oleiros ante o novo ataque da Xunta ao seu patrimonio natural. No canto de protexer as zonas declaradas como protexidas, a Xunta aprobou no seu teórico plan de protección o permiso para realizar prácticas militares.

“O Plan Especial de Protección do Monumento Natural da Costa de Dexo e Serantes impulsado pola Xunta é máis un pasaporte á degradación do lugar que un documento serio para a protección co ecosistema”, denuncia o Concello oleiro, que lamenta que se queira reducir a superficie protexida permitindo ademais entrar, a través de deportes como a escalada, nas fermosas furnas, nas que se desenvolve a vida de milleiros de aves mariñas.

Así, o Concello recorrerá e alegará a este documento “por atentar contra a vida natural e ser contrario ao Plan Xeral de Ordenación Municipal e á máis razoable versión do que debe ser un espazo natural protexido”.

Lembran que esta paraxe natural está protexida polo Concello desde o ano 2000 a través do Plan Xeral de urbanismo, logo de defendelo ante o Ministerio de Defensa, que quería declarar urbanizable parte do seu ámbito. Tras a súa inclusión na rede europea Natura como Monumento Natural, a Xunta asumía o compromiso da súa xestión e mantemento dun ámbito que abrangue desde o Faro de Mera ao Porto de Lorbé. “Esta colaboración nunca existiu. O único esforzo da Xunta foi financiar parte dun tractor para manter os accesos”, lamentan dende Oleiros.

A permisividade da Xunta abrangue tamén ás prácticas militares no ámbito costeiro, entre A Marola, O Marolete, Marola Pequena, Monte Meán, O Corval e a Cova do Ladrón, que poderían utilizarse por exemplo como zonas de tiro, algo “inadmisible” para o Concello.