CIG-Industria anunciou a convocatoria de folga indefinida, a partir do día 26 de agosto, ás 07:00 horas, na empresa concesionaria do servizo de mantemento da refinaría da Coruña, do Grupo Navec.
“Os 55 traballadores e traballadoras de Navec non cobraron aínda os seus salarios, a empresa, que entrou en preconcurso de acredores, comprometeuse a pagar este mesmo luns os soldos, pero despois de comprobalo, o persoal confirmou que non foron ingresados nas súas contas“, explica a central sindical.
Navec ten unha nave en Arteixo e só traballa para a refinaría. Segundo explica Eduardo Caamaño, secretario comarcal de CIG-Industria da Coruña, “ao parecer fixeron unhas obras polas que aínda non cobraron” o que a levou a ese preconcurso. A central sindical xa solicitou unha reunión con Repsol “para saber cal é a situación real e que vai ocorrer cos traballadores e traballadoras”.
