Ducias de persoas participaron esta tarde na concentración organizada polas ANPAS dos CEIP Juana de Vega e A Rabadeira para reclamar á Xunta de Galicia a restitución dos profesores de apoio eliminados en ambos centros, malia o incremento do alumnado. Os centros de Culleredo están entre os máis de 60 da provincia con recortes en materia educativa neste comezo de curso.

Ao inicio do acto, as ANPAs desplegaron unha pancarta co lema “Sen mestres non hai ensino, sen recursos non hai inclusión”.
Deron conta das cifras: O Juana de Vega incrementou o número de alumnado neste 2024/2025. En cambio, o profesorado de apoio reduciuse de 5 profesores a 3, e 1 titor/a de Primaria aínda non foi incorporado.
No caso de Rabadeira a situación é similar. Tamén se recortou de 2 a 1 praza de profesorado de Audición e Linguaxe, malia que o alumnado con necesidades especiais aumentou con respecto ao curso anterior.

Alberto Castro, en representación das ANPAs convocantes da concentración, explicou que “transcorrido un mes do inicio das clases e esgotadas todas as vías a través dos canles oficiais por parte dos responsables do centros educativos, vémonos na obriga moral de elevar a voz para reclamar o profesorado recortado con respecto a cursos anteriores”. Tamén reclamou “a reparación inmediata dos graves e inaceptables erros da Consellería de Educación que deixan aos nosos cativos e cativas sen os recursos que lles corresponden. Ademais, esta situación alarmante provoca que o profesorado dos centros se vexan desbordados, o que tamén dificulta o axeitado funcionamento dos mesmos”.

Pola súa parte a concelleira de Ensino, María José Santos, explicou que non se trata de mestres calquera, senón daqueles que dan apoio ao alumnado con necesidades educativas especiais, mestres de apoio que ademais permiten que o resto do profesorado poida traballar axeitadamente. “A Xunta pode gastar moreas de cartos en poñer cada ano pantallas máis tecnolóxicas e máis grandes ou en convencer aos centros para que se adscriban aos programas de ensino dixital, pero o ensino inclusivo e de calidade non é ese, senón o que está dotado de profesorado suficiente, preparado e motivado”, dixo.

Un mes despois do inicio de curso e tras terse denunciado a situación ante todas as instancias competentes, non só non se dotou a estes centros do profesorado xa previsto ao remate da matrícula, alá polo mes de xullo, senón que os máximos responsables continúan sen dar resposta nin aos colexios, nin as familias, nin ao Concello de Oleiros, quen en data 19 de setembro remitiu unha carta ao Conselleiro de Educación poñendo no seu coñecemento a situación na que se atopaban os colexios Juana de Vega e A Rabadeira e solicitando que se cubrisen as prazas pendentes; prazas absolutamente necesarias para garantir o correcto funcionamento destes centros.

Máis novas sobre os recortes

Denuncian “problemas” cos recortes en 62 centros de ensino da provincia da Coruña

Denuncian os recortes nos CEIP de Oleiros en mestres auxiliares

O profesorado do cole de Miño ponse en pé contra os recortes