- O 60% pensaron deixar a profesión.
— — —
Continúa aumentando a precariedade, e o estrés entre as enfermeiras do país. Así o denuncia Consello Xeral de Enfermaría e o Colexio de Enfermaría da Coruña, que poñen de manifesto a carga asistencial que padecen as enfermeiras de Galicia na súa vida cotiá desde hai anos é insostible. A práctica totalidade das profesionais consideran que teñen un volume de traballo alto ou excesivo e o 90 % das enfermeiras galegas recoñecen que esta presión laboral lles afectou psicoloxicamente moito ou bastante.
Así se desprende das cifras extraídas dunha macroenquisa realizada polo Consello Xeral de Enfermaría entre case 10.000 enfermeiras de toda España. Os resultados son “peores que hai dous anos”, sinalan, deixando claro que a día de hoxe ”son necesarias 10.000 enfermeiras no sistema sanitario galego (123.000 no conxunto de España) para converxer coas ratios europeas e brindar unha atención óptima aos pacientes”, sinala Inés López Carral, presidenta da Organización Colexial de Enfermaría da Coruña.
A política de contratación da Xunta que convirte ao SERGAS, “na ETT máis grande de Galicia”, leva provocando esta situación décadas. E a cousa continúa empeorando, como recoñecen o 55 % das enfermeiras galegas que participaron na enquisa, que considera que a súa situación laboral actual empeorou con respecto á que tiña antes do COVID-19. Só 1 de cada 10 di que mellorou.
Carga psicolóxica
Nove de cada dez enfermeiras galegas recoñecen que a súa carga de traballo lles afecta psicoloxicamente. Nos últimos meses, o 91 % das enfermeiras da nosa comunidade padeceron episodios de estrés; o 69 %, de ansiedade; o 67 %, de insomnio e o 31 % denuncian ter sufrido depresión.
Segundo este estudo, case o 61 % das enfermeiras galegas pensou nalgún momento que a solución podería ser deixar a profesión.
Precariedade
Máis aló da sobrecarga asistencial, a enquisa avaliou as condicións laborais e da profesión, conseguindo o apoio unánime á demanda de recoñecemento da categoría A. O 96 % das enquisadas considéraa moi ou bastante importante. Ademais, o desenvolvemento das especialidades (2,19), a conciliación da vida familiar e laboral (2,73) e o recoñecemento do desenvolvemento profesional (2,92) son os parámetros que acadan a menor puntuación.
