Os traballadores e as traballadoras de Circet Infraestructuras de Telecomunicaciones S.A continúan co calendario de folgas e mobilizacións en rexeitamento ao ERE de extinción presentado pola empresa, que en Galicia suporía o despedimento de 118 persoas.
A compañía é concesionaria en Galicia de operadoras de telecomunicacións como Movistar e Vodafone, con clientes como a Xunta de Galiza, o SERGAS, Educación, Emerxencias, Defensa e outras administracións estatais e locais.
Dáse a circunstancia de que o contrato con Movistar foi mercado por Circet en xullo deste ano, previa autorización do Goberno do Estado, e agora, apenas tres meses despois, a empresa pretende despedir a case o 30% do cadro de persoal galego.
Para a CIG-Industria “o verdadeiro obxectivo deste ERE non é outro que avanzar na subcontratación, e polo tanto, afondar na desregulación e a precarización do sector para obter aínda maiores marxes de beneficios a conta da explotación laboral”.
Folgas e concentracións
Para esta semana están convocadas tres xornadas de paro (26, 27 e 28 de novembro), que se desenvolven de xeito paralelo ás reunións do ERE que teñen lugar en Madrid.
A próxima semana tamén haberá folga os días 4 e 5 decembro, coincidindo co remate do período de consultas.
Tanto no día de onte como na xornada de hoxe, mércores, a folga está rexistrando un seguimento de practicamente o 100%. Para darlle visibilidade á súa loita, denunciar publicamente que o único obxectivo da empresa é precarizar as condicións laborais no sector e sinalar a responsabilidade de Telefónica neste conflito, o persoal vén desenvolvendo concentracións diante de cada un dos centros de traballo de Circet en Galiza, mais tamén diante de tendas Movistar e das centrais de Telefónica.
Máis novas
As traballadoras de ABAI volveron concentrarse ás portas da tenda de Movistar
