As traballadoras de residencias privadas continuaron este xoves na Coruña co calendario de mobilizacións para reclamar un convenio colectivo “digna” fronte, afirman, “a proposta insuficiente da patronal e a parális da negociación colectiva”.
Nesta ocasión, a protesta consistiu nunha marcha de vehículos que saíu da residencia Pai Rubinos, pasou pola residencia Remanso, o edificio Amizar, onde están as dependencias da Consellería de Política Social e o complexo administrativo da Xunta de Galicia en Monelos para terminar diante da residencia Concepción Arenal en Matogrande, de titularidade pública pero de xestión privada.
Con estas mobilizacións, as traballadoras denuncian, informa a CIG, “a importante perda de poder adquisitivo (do 7,8%) desde a firma do anterior convenio (2020-2023) por parte de CCOO e UGT, ao que hai que sumarlle o feito de que a subida do SMI neste período foi do 24,4%”.
“Provocando que as categorías máis baixas do convenio non cheguen ao SMI e gran parte delas estean só 10 euros por encima en 2024”, recalca a central sindical sobre as demandas do colectivo.
