Presentáronse onte os candidatos oficiais a Cociñeiro Galego 2025. Un galardón que recoñece “o labor dos cociñeiros emerxentes que ofrecen propostas culinarias de calidade, utilizan produtos de proximidade, fan unha cociña sostible e difunden estes valores”, tal e como explican desde a organización do Galicia Fórum Gastronómico, que un ano máis puideron constatar a gran expectación que xera este certame, con máis de 1.500 votos rexistrados nos tres primeiros días aberto ao público.
Entre os finalistas atopamos a un coruñés como Miguel Vázquez (Atípico, A Coruña) e a un representante da Costa da Morte como é o laxense Víctor Basante (Arrueiro, Laxe), que estarán acompañados na finalísima de Arón Álvarez (Os Maristas, Pontevedra), Bret Fernández (Prebe, Lugo), e Nel Parada (Nordestada, Portosín, A Coruña).
Os cinco candidatos “destacan pola súa ampla traxectoria no sector, ofrecer nos seus establecementos unhas propostas culinarias arraigadas á terra e á súa contorna, e por apostar pola sustentabilidade”.
A entrega de premios terá lugar o domingo 23 de marzo no espazo Auditorio do Galicia Fórum Gastronómico. Alí saberemos quen recolle o relevo dos xa premiados: Diego López (La Molinera, Lalín) en 2014; Gorka Rodríguez (A Pulpeira de Melide, A Coruña) en 2015; Jorge Gago (A Maceta, Santiago) en 2017; Alén Tarrío (Pampín, Santiago) en 2019 e Moncho Méndez (Millo, A Coruña) en 2022 e Begoña Vázquez (O Regueiro da Cova, Verín, Ourense) en 2024.
Víctor Basante (Arrueiro, Laxe, A Coruña)
De raíces bercianas, pero namorado de Laxe desde ben pequeno, a súa vocación pola cociña espertouse cando tiña 18 anos. Estudou en Coruña e, despois de pasar por cociñas de hoteis e restaurantes de Galicia, Baleares e Canarias, en 2019 abriu o seu primeiro restaurante: A Pracería. Agora, en Arrueiro quere ofrecer un enfoque máis persoal. Un restaurante pequeno cun ambiente relaxado que permite desenvolver unha cociña con mimo, detalle e sensibilidade. Estar máis presente, poder falar co cliente e
ofrecer un trato próximo e familiar. Propón unha viaxe de 6 pases cara á autenticidade, menú gastronómico co produto como protagonista e que varía segundo a tempada e o mercado.
Miguel Vázquez (Atípico, A Coruña)
Miguel elabora en Atípico unha carta galega contemporánea, que vai cambiando en función da estación do ano, e un menú degustación, que renova practicamente unha vez ao mes. Todo iso para que o comensal poida gozar dunha experiencia culinaria nova en cada visita ao restaurante. Apaixonado da cociña galega e os seus produtos: o típico. O atípico é a evolución constante desa raíz tradicional ata unha cociña contemporánea, con novos sabores e sensacións. A súa carta de viños está en constante evolución e tamén se pode gozar dunha selección de cócteles deseñados para maridar coa carta e o menú degustación.
