A Coruña acolle desde o domingo e ata o martes a décima edición de Galicia Fórum Gastronómico, que este ano terá como eixo principal ‘Un océano de cociñas’, en referencia á diversidade culinaria que brota do Atlántico. “Un evento que espera acoller a máis de 25.000 visitantes e, por tanto, un dos máis importantes do ano a nivel turístico en Galicia”, sinala o consistorio coruñés en relación a este evento. Á primeira xornada asistirá a alcaldesa, Inés Rey, que destacou a importancia desta cita que sitúa “A Coruña como a capital gastronómica de Galicia”.

Durante tres días, ExpoCoruña albergará as tendencias gastronómicas dos chefs máis prestixiosos de Galicia, ademais de coñecer ás novas promesas da cociña e descubrir todas as novidades do sector. A cita non se limita ao sector profesional xa que o público xeral tamén poderá gozar de relatorios, demostracións en vivo e degustacións nos distintos espazos habilitados, como a Ágora, o Taller ou o Auditorium. O evento contará con figuras de talla mundial como Joan Roca, Elena Arzak, Marcos Morán, Rita Magro, Ricard Camarena, Lucía Freitas, Kanji Kobayashi, Marsia Taha ou Javier Oleiros, entre outros.