O Centro Cívico dos Mallos acolleu onte pola tarde o segundo dos 11 encontros de barrio que o Concello pon en marcha no marco do estudo para a definición do novo modelo de autobús urbano.
Participaron a alcaldesa Inés Rey, e os concelleiros José Manuel Lage, Noemí Díaz e Montserrat Paz.
En total, máis de medio cento de persoas participaron no encontro, que contou cunha presentación por parte do equipo técnico do estudo do transporte urbano e unha dinámica participativa na que as persoas asistentes puideron achegar propostas sobre frecuencias, liñas, accesibilidade, conexións intermodais ou cobertura territorial.
Peticións e suxerencias
O distrito 4 conta con aproximadamente 37.132 habitantes articúlase en 13 liñas de autobús urbano (4, 5, 6, 6A, 11, 12, 12A, 14, 20, 22, 24, UDC) máis o BUH e cun total de 32 paradas.
Durante o encontro, púxose de manifesto o interese polo proceso participativo, xa que máis do 60% eran do distrito 4. Ademais, o 46% das persoas asistentes declararon acudir a título persoal, fronte a un 26% que representaban entidades asociativas e un 18% a iniciativa empresarial.
A enquisa tamén permitiu identificar cales son os aspectos máis valorados —e tamén os máis criticados— polos usuarios e usuarias do transporte urbano da Coruña. Nunha escala do 0 ao 10, os prezos foron o elemento mellor valorado, cunha media de 7,5 puntos, seguidos da accesibilidade (4,9) e das liñas e paradas (4,6) e as marquesiñas (4,5).
As melloras
Os aspectos que recibiron unha valoración máis baixa foron a intermodalidade (3,6) e a frecuencia dos servizos (3,2), evidenciando puntos febles relevantes que urxen ser abordados no novo modelo de transporte, como se vén demostrando nos foros e no buzón aberto á cidadanía.
Neste sentido, a veciñanza identificou como ámbitos prioritarios de mellora a frecuencia e tempo de espera dos autobuses, seleccionada por un 28% das persoas participantes, seguida da intermodalidade con outros medios de transporte (18%) e a adaptación de liñas aos barrios e novos puntos de interese (18%). A accesibilidade e os prezos foron as cuestións sinaladas como non prioritarias a mellorar.
Máis encontros
Polo momento, o encontro conta con medio cento de persoas inscritas a través do formulario habilitado na web www.coruna.gal/participabus, aberto á asistencia de veciñas e veciños.
As seguintes citas serán:
- 24 de abril: Centro Cívico de Monte Alto.
- 6 de maio: Centro Cívico de Monelos.
- 20 de maio: Centro Cívico do Birloque.
- 19 de maio: Centro Cívico dos Rosales
- 5 de xuño: Fórum Metropolitano.
- 10 de xuño: Centro Cívico de Eirís.
- 12 de xuño: Centro Cívico de Elviña.
- 14 de xuño: Circo de Artesáns.
