A conselleira de Vivenda e Planificación de Infraestruturas, María Martínez Allegue, manifestou, sobre os cooperativistas de Xuxán que denuncian unha subida do aluguer social inicialmente previsto e que urxen ás administracións unha solución, que “todas as vivendas protexidas teñen un prezo taxado de aluguer”.

“Iso que se di de que se duplica o importe do aluguer non é verdade, ten un prezo máximo marcado por lei, nós temos chan para que promotores e cooperativistas constrúan vivenda protexida”, especificou sobre a implicación da Xunta.

Respecto diso, dixo que en Xuxán saíron cinco parcelas a un concurso público, nun proceso “totalmente transparente”. “Un deles foi Galivivienda”, aseverou sobre a situación destes cooperativistas.

Desta promotora, aseverou que “obtivo unha subvención de dez millóns de euros que aínda non están transferidos á cooperativa” e engadiu que a mesma aínda non ten formalizado o préstamo ICO. “Leva desde 2023 esperando resposta do ICO e esa resposta vén a través dun correo electrónico no que reducen o prazo inicial da achega da garantía crediticia”.

“A Xunta non vai permitir que esas garantías crediticias do ICO desvirtuen o importe dos alugueres alcanzables”, dixo para reiterar que o Executivo galego solicitou unha reunión co Ministerio de Vivenda. Mentres, mostrou a súa confianza que a reunión o mércores de cooperativas e o ICO “solucione” a situación.