As placeiras do mercado de San Agustín veñen de remitir un escrito por rexistro dirixido á Concellería de Mercados esixindo a suspensión da licitación de concesión de postos ata que se subsanen erros rexistrados nos planos e doutro tipo.

Explican que os planos dos postos teñen as medidas incorrectas, que hai fotos contraditorias dos potos con respecto ao mobiliario que se cita no posto; e que hai mobiliario móbil que se licita cos postos pero que é privado dos ambulantes.

Igualmente, as praceiras (asinan o texto, entre outras, Gumersinda, Mª Carmen, Antonii, Madelino, Camelia, Ángela, Sara, Carlos ou Manuela) piden a suspensión da licitación ata que se “aclare por parte da administración pertinente as actividades dos postos xa que en varios casos se detecta que non se oferta a actividade que se desenvolve actualmente e que está autorizada pola administración que está licitando. É dicir, que se está licitando un posto destinado a unha activdade cando a actividade autorizada é distinta, o que imposibilita que a actual ambulante poida licitar o posto onde desenvolveu a súa actividade ata o de agora”.

Critican ademais que con estas condicións, “moitos dos posibles actuais ambulantes poidan quedar sen opción a lograr un posto no Mercado dado que para a súa actividade só se licitan os postos actualmente ocupados. Por exemplo, dous para panadería en licitación estando dous ocupados na actualidade en réxime de ambulancia, o que implica que alguén poida quedar en risco de non poder optar unha licitación xusta fronte a postos que aínda quedan valeiros pero que non se inclúen na licitación”.