O Concello da Coruña sacou a licitación o servizo para desenvolver o programa educativo ‘Visita o teu mercado’, unha iniciativa dirixida ao alumnado dos primeiros ciclos de Primaria que ten como obxectivo fomentar unha alimentación saudable e o consumo responsable desde idades temperás.
Impulsado pola Oficina Municipal de Información ao Consumidor (OMIC), o programa estrutúrase en sesións formativas nas que os menores visitarán mercados municipais da cidade, participarán en talleres didácticos sobre alimentación e gozarán dunha degustación de produtos frescos, explica o Consistorio.
As actividades, engade, combinarán contidos educativos e lúdicos “para que os nenos e nenas coñezan de preto o funcionamento dun mercado, aprendan a identificar alimentos de tempada e comprendan a importancia de apoiar o comercio local”. Para a concelleira de Emprego, Comercio e Mercados, Diana Cabanas, esta proposta é “unha oportunidade para educar en valores de saúde e sustentabilidade á vez que se fortalece o vínculo da comunidade escolar cos mercados da cidade”.
